Нясвіжскія навіны 
Кожная нацыянальная літаратура мае славутыя постаці, якія сталі прызнанымі песнярамі свайго народа, яго гістарычнага лёсу. У беларусаў — гэта Янка Купала і Якуб Колас. Праз іх творы свет пазнаў жыццё беларускага народа, звычаі, гісторыю, прыгажосць прыроды роднага краю. 2017 год адзначаны 135-годдзем з дня нараджэння народных песняроў. Менавіта гэтаму юбілею былі прысвечаны літаратурныя вячоркі “На кожнай сцяжынцы іх песня і голас…”, якія прайшлі ў Рудаўскай сель-скай бібліятэцы. У зале была падрыхтавана юбілейная выстава твораў Якуба Коласа і Янкі Купалы “Год вялікіх юбіляраў”. Памяшканне ўпрыгожана букетамі палявых кветак. Падчас мерапрыемства чытанне вершаў суправаджалася дэманстрацыяй слайдаў з беларускімі пейзажамі. З багатай літаратурнай спадчыны народных песняроў былі адабраны толькі некалькі старонак — лірычныя вершы пра самыя блізкія сэрцу мясціны, вершы-летуценні, вершы, навеяныя вобразамі любых. Чытачы бібліятэкі — Д.М. Сямак, А.І. Мельнік, У.А. Валеева — чыталі знаёмыя вершы Янкі Купалы — “У лесе”, “Лясное возера”, “Адцвітанне”, Якуба Коласа — “Лясам Беларусі”, “На лузе”, “На полі вясною”.
З паэзіяй Янкі Купалы і Якуба Коласа цесна звязана творчасць беларускага музычнага ансамбля “Песняры”, песні ў іх выкананні сталі сапраўднымі шлягерамі. У песнях вершы набылі новае жыццё і разляцеліся далёка за межы Беларусі. Вядомыя беларускія творы ў выкананні ансамбля “Песняры” — “Спадчына”, “Явар і каліна”, “Не глядзі” на словы Янкі Купалы, “Мой родны кут…” на словы Якуба Коласа былі лейтматывам мерапрыемства. На развітанне лірычнага падарожжа прагучала некалькі радкоў Петруся Броўкі:
Зямля Беларусі, зялёныя долы!
З крыніц тваіх чыстых пад шумнай вярбой
Зачэрпнулі думы Купала і Колас,
З тваёю журбой і ўцехай тваёй;
На кожнай сцяжынцы іх песня і голас…
Іна ЕМЕЛЬЯНЧЫК,
бібліятэкар I катэгорыі Рудаўскай сельскай бібліятэкі
