Нясвіжскія навіны Атрымліваючы сярэдне-спецыяльную адукацыю ў Полацкім педагагічным каледжы імя Ф. Скарыны па спецыяльнасці “музычнае выхаванне” , Вольга Александровіч была ўдзельніцай народнага вакальнага ансамбля “Вясна”, для якога ў той час адной з крыніц натхнення стала “Студэнцкая вясна” ў рамках Дзён моладзі на “Славянскім базары” ў Віцебску. З 2000-га года прыехала працаваць у Дом культуры Гарадзей-скага цукровага камбіната. Пазней завочна паступіла ў Беларускі дзяржаўны ўніверсітэт культуры і мастацтваў на спецыяльнасць “народная творчасць (харавая музыка народная)”. Менавіта ў гэты час нарадзілася ідэя стварыць пры ўстанове культуры вакальны ансамбль, які атрымаў назву “Забава”. У калектыў падабраліся тыя, хто вельмі любіў музыку, не шкадаваў асабістага часу на заняткі творчасцю.
І пастаўленая мэта, дзякуючы ініцыятыве арганізатара і падтрымцы кіраўніцтва цукровага камбіната, была дасягнута.
На рэпетыцыях вучыліся спяваць, бо аднаго жадання ўдзельнічаць у самадзейнасці было мала, для непрафесіяналаў патрэбны былі гадзіны навучання, — расказвае Вольга Вікенцьеўна. І працягвае:
— А рэпертуар падбіралі самы розны. Абавязковая ўмова — каб падабаўся слухачу рознага ўзросту.
Аматарскі калектыў, куды ўвайшлі людзі розных прафесій, заваяваў свайго слухача на пляцоўках раённага, абласнога і рэспубліканскага ўзроўню. Неаднаразова ўдзельнічаў у міжнародных фестывалях. Беларускія Слуцк і Жабінка, Гродна, Скідзель, Гомель і Бабруйск, польскія Гданьск і Люблін, Штум і Мальбарк, ра-сійскія Растоў-на-Доне і Азоў і іншыя — гарады, дзе ведаюць ансамбль.
З вясны бягучага года вакальны ансамбль “Забава” носіць заслужанае ганаровае званне “народны”. Аб гэтым было аб’яўлена ў Палацы прафсаюзаў у сталіцы Беларусі ў рамках канцэртнай праграмы конкурсу “Новыя імёны Беларусі”.
— Падзея для нас стала вельмі хвалюючай і запамінальнай, бо мы стаялі на адной сцэне з зоркамі тэлебачання і беларускай эстрады Аленай Спірыдовіч, Сашам Нэма, Ірынай Дарафеевай, Анатолем Ярмоленкам, — дзеліцца Вольга Вікенцьеўна.
— Візітнай карткай нашага ансамбля ў той дзень стала беларуская народная песня “Гэй, забава!..”, якая выклікала бурную падтрымку залы.
Сёння ў рэпертуары “За-бавы” беларускія, рускія і ўкраін-скія песні: “Квітней ты, мая Беларусь!”, “Мы — единое целое!”, “Улыбка Бога — радуга”, “У далёкім краі” і іншыя.
У “Забавы” шмат сяброў у краіне і за яе межамі. Напрыклад, гарадзейскі ансамбль у час канцэртаў выконвае песню з рэпертуару калектыву “Беларусы”, якім кіруе Валерый Шмат. Артысты заўсёды рады сустрэчам у час мерапрыемстваў.
Добрыя сябры ў “Забавы” з’явіліся і ў Прыбалтыцы. З 1 да 16 верасня ў г. Азове праходзіў міжнародны фестываль краін СНД і Балтыі “Садружнасць”, дзе артысты з Нясвіжчыны разам з многімі калектывамі з Расіі, Арменіі, Індыі, Літвы і іншых краін таксама бралі ўдзел. У тыя дні адзначалася і 950-годдзе горада.
На фестываль быў запрошаны і танцавальны калектыў з Юрмалы “BRIZE” (кіраўнік Юрыс Пога)…
Наступная сустрэча беларусаў і латышоў адбылася ўжо праз некалькі тыдняў — калі “Забава” ў канцы верасня выязджала з канцэртам на Дні Беларусі ў латвійскі горад Ауцэ. Сябры з Юрмалы спецыяльна прыехалі на іх канцэрт…
Неразрыўна з “Забавай” існуе яшчэ адзін аматарскі калектыў, які, дзякуючы высокаму майстэрству, заваяваў сваё кола прыхільнікаў у Беларусі і за яе межамі. Гэта народны ансамбль танца “Узорыца”, якім кіруе Наталля Сабіч.
— Таленавітая, творчая асоба, добра валодае навыкамі работы з харэаграфічным калектывам. Яе пастаноўкі — сінтэз рэжысуры танца, багатай харэаграфічнай лексікі і акцёрскага майстэрства ўдзельнікаў. На працягу ўсёй сваёй творчай дзейнасці яна актыўна вядзе збор цікавых матэрыялаў для пастановачных работ, пастаянна знаходзіцца ў творчым пошуку. Наталля — добры арганізатар і ініцыятыўны кіраўнік, адданы сваёй справе, — менавіта так характарызуе сваю калегу спецыяліст па культурна-масавай рабоце ААТ “Гарадзейскі цукровы камбінат”, загадчык Гарадзейскага цэнтра культуры Вольга Александровіч.
Наталля Аляксандраўна скончыла Мінскае культурна-асветніцкае вучылішча. Пазней атрымала вышэйшую адукацыю ў Беларускім дзяржаўным педагагічным універсітэце імя Максіма Танка. Працавала педагогам. А з 2007 года з’яўляецца кіраўніком ансамбля танца “Узорыца”, якому ў 2013 годзе было прысвоена ганаровае званне “народны”. У мінулым годзе калектыў пацвердзіў гэта званне, развівае далей сваю творчасць на ніве культуры.
У скарбонцы з апошніх напрацовак “Узорыцы” — беларускія народныя танцы “Святочная”, “Лявоніха”, “Весялуха”, харэаграфічная замалёўка “Как родная меня мать провожала”, “Моя Марусечка”, эстрадны танец “По серпантину” і іншыя.
З кожнай рэпетыцыяй, кожным выступленнем майстэрства “Узорыцы” адточваецца і зіхаціць новымі фарбамі, што дорыць не толькі пазітыўны настрой гледачам, але і падкрэслівае прафесіяналізм танцораў. Так, калектыў “Узорыца” стаў лаўрэатам ІІІ ступені ХІІ фестывалю народнай творчасці Мінскай вобласці “Напеў зямлі маёй” за ўвасабленне беларускай танцавальнай культуры ў аматарскім харэаграфічным мастацтве.
Клапоцяцца ў калектывах і пра сцэнічныя вобразы. Пры пад-трымцы адкрытага акцыянернага таварыства “Гарадзейскі цукровы камбінат” абнаўляюцца касцюмы артыстаў, бо, як вядома, асноўным іх назначэннем з’яўляецца раскрыццё гістарычнага каларыту таго народа, які прадстаўлены на сцэне, а таксама яны з’яўляюцца візітнай карткай танцора.
Напрыклад, летам гарадзейцы ўпрыгожылі сваё выступленне белымі ўборамі (колеру чысціні, дабрыні і ўсяго самага найлепшага на зямлі) з “цвятком радзімы васілька”.
Эфектная прыгажосць сцэнічных касцюмаў гарадзейцаў падкрэслівае, у першую чаргу, перад гледачом адзінства ўсіх удзельнікаў. Нездарма, апошняя праграма калектываў “на ўра” праходзіць пад назвай “Мы — адзінае цэлае!”. Упершыню яна была прадстаўлена на суд гледача і кампетэнтнага журы ў чэрвені на традыцыйным аглядзе-конкурсе канцэрна “Белдзярж- харчпрам”, які прайшоў у Бабруйску і які, дарэчы, адразу сабраў тысячы праглядаў у сацыяльных сетках Інтэрнэту. З праграмай “Мы — адзінае цэлае!” многія несвіжане і госці горада з задавальненнем пад воклічы “Прафесіяналы! Брава!” пазнаёміліся ў апошнія выхадныя лета на канцэртнай пляцоўцы ў парку. Выступленне “Забавы” і “Узорыцы” стала заключным акордам летніх мерапрыемстваў, якія арганізоўваліся кожныя выхадныя.
Творчыя калектывы ААТ “Гарадзейскі цукровы камбінат” ведаюць і аматары футбольнага клуба “Гарадзея”, і шчырыя працаўнікі збожжавай нівы нашага раёна і суседняй Стаўбцоўшчыны, цёпла і сардэчна прымаюць іх як на свяце горада Капыля, так і ў Растове-на-Доне.
Гэта значыць: мэта стварыць сапраўдны творчы калектыў пры адным з флагманаў цукровай прамысловасці Беларусі дасягнута, а творчы пошук калектываў працягваецца…
Сёння Вольга Вікенцьеўна са шчырай удзячнасцю ўспа-мінае сваіх педагогаў з Гарадзейскай дзіцячай музычнай школы, якую яна скончыла па класе баяна, а разам з імі — свайго дзядзьку, які працаваў у музычнай школе Нясвіжа — Анатоля Нікадзімавіча Бруя, які ёй, школьніцы, прывёз некалі ў Студзёнкі маленькі баян. Што датычыцца сённяшняй працы работніка культуры, то яна прызнаецца ў любові і ўдзячнасці да сваёй глядацкай аўдыторыі.
— Самая высокая адзнака для нас, — падкрэслівае Вольга Вікенцьеўна, — апладысменты, бо разумееш — наша выступленне прымаецца душой і сэрцам чалавека…
Сярод узнагарод народнага ансамбля танца “Узорыца” і народнага вакальнага ансамбля “Забава” — Ганаровыя граматы, Падзякі і Дыпломы розных узроўняў — ад раённага да міжнароднага. А сярод асабістых узнагарод іх кіраўнікоў — Вольгі Александровіч і Наталлі Сабіч — Ганаровыя граматы Міністэрства культуры Рэспублікі Беларусь за актыўны ўдзел у розных мерапрыемствах.
На здымках: моманты выступлення калектываў ААТ “Гарадзейскі цукровы камбінат” “Забава” і “Узорыца” ў гарадскім парку Нясвіжа.
Іна ВАСІЛЕВІЧ.
